Copyright extra
Somesh Nagdev Digitalisashon i teknologia ta un tópiko ku tur dia ta bira mas i mas relevante. Ta fundamental pa komprondé tur e tendensianan ku ta transformá nos manera di biba i traha. Pa trese mas konsientisashon riba e aspekto teknológiko, a papia ku Somesh Nagdev, ko-propietario di Galvan Group, un kompania spesialisá den desaroyo di wèpsait, outomatisashon i solushon digital inovativo. Somesh Nagdev Somesh ta e direktor di Galvan Group. Galvan Group su focus ta pa stimulá kambio dor di konekshon humano. Somesh ta na enkargo di benta i maneho di proyektonan, kaminda e ta enfoká riba efisiensia di operashonnan i sigurá ku kada kliente ta sinti nan skuchá pa Galvan Group. Ademas, e ta sigurá ku tur proyekto ta keda ehekutá ku ekselensia i ku nan ta logra resultadonan eksitoso. Somesh ta konta ku el a studia ‘Business’, i ku IT el a siña riba su mes. E ta menshoná ku den e área aki, tin sosionan ku ta mas vèrsá kuné. Su eksperensia a mustra ku, si bo tin un bon base, bo por hasi hopi kos i ta mas efisiente. E ta bisa ku promé ku bo outomatisá, bo mester pinta i simplifiká e proseso. E konsepto aki ta duna bo un guia pa krea solushon ku ta funshonal i efisiente. Galvan Group Somesh ta sigui bisa ku Galvan Group ta eksistí ya pa 2 aña. E organisashon ta spesialisá den traha wèpsait, aplikashon, software i tur kos ku por keda digitalisá òf outomatisá, ku e meta pa hasi trabou di hende mas fásil i mas efisiente. Segun Somesh, e parti di ku nan ta disfrutá mas di dje ta digitalisashon di proseso kompliká, kaminda nan por optimalisá i simplifiká kos ku normalmente ta difísil. E merkado tin hopi demanda, komo hopi hende ta buska manera pa kambia nan método di trabou, sigur awor ku tin inteligensia artifisial. Hendenan ta interesá di wak kon nan por hasi nan trabou mas efisiente, miéntras ku nan ta sigui produsí resultado haltu i mantené kòntròl riba tur nan prosedura. Inteligensia Artifisial i Deepfake Algun dia pasá, EXTRA tabata víktima di inteligensia artifisial, ‘deepfake’, kaminda nan a traha un video falsu ku ta kasi similar ku e video real. E evento aki ta un bon ehèmpel di kon inteligensia artifisial por keda usá riba medionan sosial, pero tambe di e limitashon i riesgo ku esaki ta trese. Segun Somesh, teknologia tin su parti bon i su parti malu. Durante historia di hende, nos a mira ku tur inovashon tin konsekuensia. Relashoná ku ‘deepfake’, tin diferente inisiativa legal kaminda paisnan grandi manera Merka i Unidat Europeo ta purba pasa e lei, ku bo mester indiká ora algu ta trahá ku inteligensia artifisial. Kompanianan grandi manera Facebook, Meta i YouTube tambe ta purbando di krea un solushon. Pero aún, no tin un solushon legal òf organisatorio ku por keda apliká mundialmente. Ta alerta riba loke bo ta wak “Pa e hende normal, e regla ta simpel: ta alerta riba loke bo ta wak. E responsabilidat ta keda na e persona pa wak bon i ser krítiko,” e ta bisa. Un video ku ta “too good to be true,” mester hala bo atenshon ku tin algu robes. Somesh ta duna ehèmpel riba e video kaminda Will Smith ta kome spaguèti. E lepnan tabata diferente i e oudio tambe tabata zona otro. Sistemanan artifisial por krea un hende su bos, pero e resultado nunka lo no ta 100% akurat; e lo ta mas o ménos 70–80%. Kòrsou i Digitalisashon E pregunta si Kòrsou ta atras den digitalisashon tin un toke di realidat. Somesh ta splika ku tin hopi kos ta eksistí pafó di Kòrsou ku aún nos no tin. Segun Somesh, despues di COVID hopi kos a kambia, i hopi inovashon a bin den sektornan privá, I e organisashonnan aki por ofresé mas produkto i servisio nobo. Ku hende ta hasi uso di e teknologianan aki ta “si i nò,” e ta dependé di vários faktornan. Somesh ta splika ku ta dependé kon simpel e situashon ta, e abilidat di e persona, i e resultado ku bo ke logra. Pa situashonnan ku ta mas kompliká, ku ta enbolbí informashon spesífiko di Kòrsou, su kultura, idioma òf prosedimentu lokal, lo ta mas mihó pa buska un eksperto pa hasi e trabou. E realidat ta ku Kòrsou tin progreso, pero e ritmo ta diferensiá entre sektornan privá i públiko. Tin posibilidat pa trese kambio, pero edukashon, konsientisashon i sosten teknológiko ta esensial pa por logra esaki. Braindrain i retenshon di talento Segun Somesh, e situashon ta dependé di e kondishon spesífiko. ‘Vergrijzing’ no ta solamente un problema na Kòrsou, sino un fenómeno rònt mundu. Pa logra inklushon digital, nos mester traha riba sistemanan struktural, por ehèmpel, un trayektoria di dos aña kaminda e poblashon mayor ta entrená e siguiente generashon. Sin e sistema aki, lo ta hopi difísil pa haña hende ku por sostené e transformashon digital. Somesh ta splika ku digitalisashon na Kòrsou ta un proseso ku ta pidi pasenshi, edukashon kontinuo i adaptashon di sistema, pa por logra inklushon di tur edat i retenshon di talento. Rekomendashon di Inteligensia Artifisial (AI) Somesh ta bisa ku ChatGPT ta e plataforma di AI mas konosí i mas usá na mundu. “Esei a kibra e barera di inteligensia artifisial,” e ta bisa. ChatGPT lo kontinuá di ta e aplikashon di mas popular, tantu pa studiante, profeshonal komo empresanan. Sinembargo, Somesh ta preferá Gemini, e modelo di AI desaroyá pa Google. “Nos ta usa Gemini regularmente paso e por tuma mas informashon, i e manera ku e ta formulá su kontesta ta mas serka i akurat di loke nos ta deseá. Su Papiamentu no ta perfekto, pero ta mas mihó ku ChatGPT.” E ta agregá ku e eskoho di plataforma ta dependé di loke bo ke logra. “Bo mester evaluá bon kiko bo ke pa AI hasi pa bo. No pone mas informashon personal ku ta nesesario, paso e datonan ku bo duna AI lo keda registrá den nan sistema.” Den kaso kaminda informashon sensitivo ta enbolbí, manera ku abogado, akountent òf negoshinan ku datonan di kliente, Somesh ta rekomendá pa traha ku un modelo privá, riba un server lokal. “Asina, tur informashon ta bo propiedat i no ta keda konektá ku sistemanan grandi manera Google òf Microsoft. Ta un manera pa protehá bo privasidat i siguridat.” Kon leu nos sektor empresarial ta ku outomatisashon? “Ta dependé di kada negoshi.” Tin empresa ku ta usa papel, otro ku ta mas digital, tin diferente opshon. Somesh ta rekomendá Google Docs, un alternativa popular, similar na Microsoft Word, pero riba ‘cloud’, kaminda bo por kompartí akseso ku bo tim. Un kolega por duna komentario, i bo por wak e kambio mesora. E ta un manera pa optimalisá kolaborashon. E manera ku digitalisashon ta keda implementá ta varia abase di kada negoshi i nan nesesidatnan. Somesh ta sigui bisa ku ta importante pa semper kòrda ku: “goedkoop is duurkoop” i “sòpi purá ta sali salu”. Si bo implementá algu sin planifikashon, investigashon òf analisá, e por sali mas karu, tuma tempu i mas esfuerso. Pa evitá esaki, e promé kos ku Galvan Group ta hasi, ta komprondé e proseso. E organisashon ta pinta un diagram pa wak kon e sistema ta hinká den otro, pa identifiká puntonan di atenshon pa por definí kiko mester keda digitalisá. Si e proseso ta bon definí, digitalisashon no ta solamente hasi e trabou mas efisiente, pero ta yuda baha gastu i spar tempu. Opstákulo den teknologia na Kòrsou “E opstákulo prinsipal,” segun Somesh, “ta e mindset i e falta di transparensia.” Hopi hende tin miedu di loke por pasa i no ke invertí den dje. E realidat ta ku mesun manera ku nos a adaptá di kabai pa outo, di e mesun manera nos mester adaptá bai teknologia: no mester bira di 1 pa 100 mesora. Bo por kuminsá ku paso chikí, di 1 pa 5, i despues sigui. Ora bo bira mas konfortabel, bo mes lo mira e benefisio di e invershon den teknologia, i e ta krea un gana den bo pa sigui buska otro alternativanan. E no ta solamente un problema di kapasidat tékniko, sino tambe un desishon emoshonal ku ta influensiá bo aktitut. Un otro opstákulo ta e skala di e negoshi. Pa un kompania lokal ku tin 2 òf 3 filial, e gastu pa digitalisashon i outomatisashon ta di manehá. Pero pa un kompania na Merka ku tin 1.400 filial, e gastu i esfuerso pa implementá e sistema ta hopi mas grandi. Banda di esakinan, tin mas faktor ku ta hunga un ròl. Mishon di Galvan Group pa e merkado lokal Galvan Group ta enfoká riba digitalisashon total di e proseso. Hopi prosedura ta ‘paper-based’. Por ehèmpel, Galvan Group tin un fundashon komo kliente. E fundashon ta duna skol coupons pa studiantenan ku no tin abilidat finansiero, pa nan por haña pan, keshi, kuminda for di diferente kompania. Na e momentu aki, e proseso ta manual. Dor di digitalisashon, e sistema lo ta kompletamente outomatisá. Esaki ta buta ku e proseso ta bira mas fleksibel i e atministrashon lo ta mas sentralisá. E fundashon lo por ahustá e coupon nan mas fásil, I ta krea mas seguridat den e proseso. Somesh ta rekomendá e komunidat pa ta kurioso i hasi investigashon. Por hasi uso di inteligensia artifisial pero semper wak otro referensianan pa komprobá ku e informashon ta akurat. Banda di esaki, ta mas kritiko i evitá di klek riba linknan sospechoso. E responsabilidat ta keda den bo man. Pa mas informashon por bishitá e página sosial di Galvan Group: Galvangroup.co
